Massimo Iaretti 
di Fabrizio Vielmini
Nissa – Coma minca ani, ier, 14 d’aost, ij nissard a l’han selebrà l’eroin-a dla sità, Catlin-a
Seguran-a (an nissard Catarina Segurana). Lavandera, nassùa sempia fomna dël pòpol, Seguran-a a
‘n ancarna ij valor ëd coragi e resistensa ‘d cost pòpol savojard: ant ël moment pì dramatic dl’assedi
franco-turc dl'istà 1543, quand ij gianisser dël Sultan a l’ero rivà pianté so drapò ans ij rempart dla
sità, pròpe chila a l’ha avù la fòrsa ‘d ranché ‘l simbol dij turc d’ant le man dl’assalitor, inspiranda
parej la rispòsta dij soldà ‘d Savòja. Ël monument a la mostra con an man sò palëtta ‘d rentat, con la
qual a donà dij colp violent ans ij cap dij gianisser, an campandje giù dle muraje. Fin-a se a l’ha nen
podù bloché l’invasion ëd la sità, l’exploit ëd Seguran-a danans al nemis a fu anportant për artardé
d’un dì l’ocupassion e contribuì a la resistensa eròica dël Castel, fin-a a l'ariv dle trope dël Duc Carl
III, ël 9 stembèr 1543, ch’a liberà la Contea an provocanda la derota dl'armada franco-turca.
Arcordaja ‘l dì anans dl’Assunssion, la figura ‘d Seguran-a as confond con cola dla Vergin,
dont as dis ch’a i saria stait n’aparission arlongh ëd l’assedi, dcò sorgiss ‘d fé e fòrsa dla resistensa
nissarda. Ant ij period quand la Contea a l’è staita sota l’ocupassion fransèisa, an particolar ant ël
moment dla furia rivòlussionaria, la figura ‘d Seguran-a a l’è staita simbol d’oposssion a la
dominassion ëd Paris e ‘d fedeltà a Turin.
A sorprend donca coma costa tradission a ‘rman-a ativa e vibranta fin-a 163 ani dòp la
smembrament ëd l’Ëstat savojard e sota ‘l tricolor fransèis. Ier an particolar, coma aniversari ch’a fa
480, la selebrassion a l’è staita cariaja d’un valor particolar. A selebré a i ero ‘l sindich ‘d Nissa,
Christian Estrosi, ansema ‘l vescov, Monsgnor Jean-Philippe Nault. Con tuta evidensa, fin-a ant la
patria dël giacobinism, la memòria e le tradission a l’han la priorità dzora minca autra
considerassion. Da tut sòn, ij piemontèis a podrio mach pié esempi.
